पाठेघरको मुखको क्यान्सर विरुद्धको एचपिभी खोप अभियान यही माघ २२ गतेदेखि देशभर सुरु हुँदैछ । स्वास्थ्य कार्यालय बाँकेको आयोजनामा सोमबार खोप समन्वय समितिका पदाधिकारी र सञ्चारकर्मीसँग अन्तरक्रिया तथा अभिमुखीकरण गरिएको छ ।
सरकारले अभियानअन्तर्गत देशभर सामुदायिक र संस्थागत विद्यालयको कक्षा ६ देखि १० सम्म पढ्ने र विद्यालय बाहिर रहेका १० देखि १४ वर्ष उमेर समूहका किशोरी तथा बालिकालाई खोप लगाउने तयारी गरेको छ ।
स्वास्थ्य कार्यालय बाँकेका प्रमुख, वरिष्ठ जनस्वास्थ्य अधिकृत अंगतबहादुर शाहीले एचपिभी खोप अभियान सञ्चालन गर्नका लागि आवश्यक तयारी पूरा भएको जानकारी दिए । जिल्लाभर कुल ३६ हजार ९ सय ५० जना किशोरी तथा बालिकालाई खोप दिइनेछ ।
जिल्लामा रहेका ८ वटा स्थानीय तहमध्ये ४ वटामा पहिलो चरणमा र बाँकी ४ वटा स्थानीय तहमा दोस्रो चरणमा खोप अभियान सञ्चालन हुने उनले बताए ।
स्वास्थ्य कार्यालय बाँकेका खोप फोकल पर्सन नरेश श्रेष्ठका अनुसार माघ २२ गतेदेखि फागुन १ गतेसम्म नेपालगन्ज, कोहलपुर, खजुरा र जानकीमा खोप अभियान सञ्चालन हुनेछ । यी ४ वटा स्थानीय तहका २४ हजार ५ सय ८९ जना किशोरी तथा बालिकालाई उक्त खोप दिइनेछ ।
यस्तै माघ ३० गतेदेखि फागुन ६ गतेसम्म राप्ती सोनारी, बैजनाथ, डुडुवा र नरैनापुरका १२ हजार ३ सय ६१ जनालाई खोप दिने कार्यक्रम रहेको श्रेष्ठले बताए । खोप अभियान सञ्चालनका लागि जिल्लाभर २ सय ९३ वटा खोप केन्द्र स्थापना गरिएको कार्यालयले जनाएको छ ।
भेरी अस्पतालका प्रमुख कन्सल्टेन्ट फिजिसियन डा. राजन पाण्डेले यौन सम्पर्क हुनुभन्दा अगाडि खोप लगाउँदा बढी प्रभावकारी हुने भएकाले सरकारले कक्षा ६ देखि १० सम्म अध्ययन गर्ने र विद्यालय बाहिर रहेका १० देखि १४ वर्ष उमेर समूहका किशोरी तथा बालिकालाई खोप लगाउन लागेको बताए । विशेषगरी यौन सम्पर्कका माध्यमबाट भाइरस संक्रमणका कारण पाठेघरको मुखको क्यान्सर हुने सम्भावना रहेको उनले सुनाए ।
बर्दियाको मधुवनमा आयोजित औद्योगिक व्यापारिक, कृषि, सांस्कृतिक तथा पर्यटन महोत्सव २०८१ मा स्थानीय कलाकारहरुलाई अपमान गरिएको घटना सार्वजनिक भएको छ।
मधुवन उद्योग वाणिज्य संघ कुसुम्बा बजारको आयोजनामा माघ १५ गतेदेखि २५ गतेसम्म सञ्चालन भइरहेको महोत्सवमा स्थानीय कलाकारलाई प्रस्तुति दिने क्रममै आयोजकले बीचमै साउण्ड सिस्टम बन्द गरिदिएपछि कलाकारहरु आक्रोशित भएका छन्।
हप्तौं लगाएर तयार पारेको नृत्य देखाउन नपाएपछि एकजना पीडित कलाकारले सामाजिक सञ्जालमा आफ्नो गुनासो पोखेका छन्। उनले लेखेका छन्, “हामी हप्तौं लगाएर सिकेर सभ्य नाच देखाउदा बिचमै गित बन्द गर्न लगाउने, महोत्सव सधै ठेकेदार अनि रङ्गौलीहरूको राज गर्ने थलो रहेछ त्यसैलाई सबैले साथ दिने पनि रहेछन।”
स्थानीय कलाकारलाई प्राथमिकता दिने भने पनि आयोजकले व्यवस्थापन गर्न नसकेको आरोप लागेको छ। महोत्सवमा राष्ट्रिय कलाकारद्धारा दोहरी गितबाट मनोरञ्जन गराउने व्यवस्था गरिएको छ। तर स्थानीय कलाकारलाई भने अपमानित गरिएको छ।
यस घटनाले महोत्सवको व्यवस्थापनप्रति गम्भीर प्रश्न उठाएको छ। एकातिर मेलामा दर्शकको उपस्थिति कम भएपछि लाखौं खर्च गरेर राखिएको खेलकुद तथा अन्य सामानहरुका स्टल राखेका सञ्चालक पनि चिन्तित छन्। यस्तो उपस्तिथिले आफ्नो लगानी डुब्न सक्ने उनीहरूको आशंका रहेको छ। अर्कोतिर स्थानीय कलाकारहरुलाई अपमानित गरिएको घटनाले महोत्सवको औचित्यमाथि नै प्रश्नचिन्ह खडा गरेको छ।
